Lubusan at Matapang

Kung ikaw ay iibig at lulundag sa bangin ng alinlangan
Kung ikaw ay titindig sa banta ng kawalang kasiguraduhan
Kung ikaw ay haharap at susugod sa libong hanay ng pasakit
Tandaan lamang…

Umibig ng lubusan
Walang pagkukulang
Lahat-lahat
Sunugan
Wasakan
Ubusan

Umibig ng matapang
Walang pagdududa
Walang takot
Walang alinlangan
At buo ang pananalig

Dahil baka ika’y magtagumpay
Baka ikaw ay mangingibabaw
Baka makuha ang inaasam-asam
Baka mahawakan ang kanyang mga kamay na kay tagal tinago
Ng mga nakasanayang ritwal ng suyuan at habulan
Baka masulyapan ang kanyang mapapanglaw na mata
Na lagi rin pala nakamasid sa iyo.

Ngunit alalahanin din na maaari kang mabigo
Matalo
Mapuksa ng isang libong beses ngunit walang pangako ng pagkamatay
Masaktan ng labis labis
Mapaatras at magupo
Lumuha at lumuha pa ulit

Sa lahat ng iibig ng lubusan at matapang
Ang akin lamang munting alay ay ang mainit na pagsalubong
Sa inyo tunay na mga mandirigma ng buhay at kawalang katiyakan
Ang aking payak na alay ay ang aking lamesa
Latagan ng mga bote ng serbesa sa inyong tagumpay at kabiguan
Sa inyong mga kwento ng tila muling pagsilang at kamatayan
Ng mga luha at ngiti
Ng saya, pait at pighati.

sashaninel june 22 2006